කතානියා සාන්ත ආගතා දේවස්ථානයේ මංගල්ලය තව නොබෝ දිනකින් ආරම්භ වෙයි.ඉතාලියේ පැවැත්වෙන දේවස්ථාන මංගල්ලය වලින් ප්‍රමුඛත්වය ගන්නේ සාන්ත ආගතා දේවස්ථානයේ මෙම මංගල්ලයයි.එමෙන්ම යුරෝපීය රටවල පවත්වනු මෙම ආගමික උත්සවවලින් සාන්ත ආගතා දේවස්ථානයේ පැවැත්වෙන මෙම උත්සවය තෙවැනි තැන ලබා ගන්නා බව බොහෝ දෙනෙක් නොදන්නවා ඇත.එය කතානියා නගරයේ වෙසෙන අප සැවොම ආඩම්බර විය යුතු කරුණකි .
මෙම උත්සවය අවසාන වීදි යන දිනයේ එනම් පෙබරවාරි මස 5වෙනි දා එම උත්සවයට සහභාගි වන අයට අප Vos සංවිධානයෙන් සිසිල් පැන් මෙන්ම පානිය ජලය ලබා දෙන බව බොහෝ දෙනෙක් දන්නා කරුණකි .අප සංවිධානය වසර ගණනාවක් පුරා මෙම කර්තව්‍යය සිදු කරනු ලබයි.
මේ කර්තව්‍යය සාර්ථක කර ගැනීම සඳහා බොහෝ ශ්‍රී ලාංකිකයන් අපිට මිල මුදලින් මෙන්ම ශ්‍රමයෙන්ද උදව් උපකාර කරන බව අප සඳහන් කළ යුතුමය .
ඒ අතරතුර “ඇයි ඉතාලිකාරයන්ට වතුර බෝතලයක් ගන්න සල්ලි නැද්ද” අසන ශ්‍රී ලාංකිකයන්ද විරල නොවේ.ශ්‍රී ලාංකිකයන්ට උදව් උපකාර කිරීමේ අරමුණ පෙරදැරි කර ගත් Vos සංවිධානය ඉතාලි ජාතිකයන්ට පානීය ජලය ලබා දීම පිළිබඳව උපහාසයෙන් කථා කරන බොහෝ දෙනෙක්ට මෙම “වතුර බෝතලයේ” ඇති යටි අරුත පහදා දීම මෙම ලිපියේ ප්‍රධාන අරමුණයි.
මෙම මංගල්ලයේ අවසන් දිනයේ අති විශාල ජනකායක් කතානියා නගරයට රොක් වෙයි. කතානියා නගරයට ආසන්න ප්‍රදේශවලින් පමණක් නොව දුර බැහැර ප්‍රදේශවලින් පවා එක්වෙන මෙම ජනකාය ආසන්න වශයෙන් මිලියන‍යකට වඩා වැඩි බව ගණන් බලා තිබේ. ඉතින් එවන් ජනකායක් මැද ඉතාලි ජාතිකයෙක්වත් නොකරන අන්දමේ ක්‍රියාවලියක යෙදෙමින් පානීය ජලය බෙදා හරින ශ්‍රී ලාංකිකයන් දෙස මෙම සංචාරකයන්ගේ අවධානය යොමු වන්නේ නිතැතිනි. මෙහිදී ඉතාලි ජනමාධ්‍ය මෙන්ම ඉතාලි ජාතිකයන්ද පැමිණ තොරතුරු විමසීම මෙන්ම අප කරන කාර්ය ඇගයීම නිතැතින්ම සිදු වෙයි.
මෙහිදී ශ්‍රී ලංකාව පිළිබඳව ඉතාලි ජාතිකයන්ට ඇතිවන පැහැදීම හා ළබැඳියාව නිසා,ඔවුන් විදේශිකයන්ට රැකියාවක් ලබා දීමේදී ශ්‍රී ලාංකිකයන්ට ප්‍රමුඛත්වයක් ලබා දෙයි .එමෙන්ම අපගේ යම් යම් අවශ්‍යතාවයන් ඉටු කර ගැනීමට යන කාර්‍යාලවලදී පවා අප සමග සහයෝගයෙන් කටයුතු කිරීමට ඔවුන් උත්සුක වෙයි.
ජනමාධ්‍ය මඟින් පානීය ජලය බෙදා හරින ශ්‍රී ලාංකිකයන් පිළිබඳව ප්‍රචාරය කරද්දී ඉතාලි ජාතිකයන් අතර කථාබහවලදී ,අපේමේ සත්කාරය පිළිබඳව ප්‍රශංසාත්මකව කථා බහ කරද්දි ශ්‍රී ලංකාව පිළිබඳව ඉතාලි ජාතිකයන්ගේ අවධානය අපේ පුංචි දිවයින දෙසට යොමු වෙයි. ඒ නිසා මෙය අපේ රටේ සංචාරක ව්‍යාපාරය නංවාලීමටද රුකුලක් වන බව සඳහන් කළ හැක
Vos සංවිධානය මඟින් ලබා දෙන වතුර බෝතලයක් නිසා ශ්‍රී ලංකාවට ශ්‍රී ලාංකිකයන්ට වෙන සේවාව ඉමහත් බව මෙයින් ඔබට පැහැදිලි වෙනු ඇත.
Vos සංවිධානය හැම මොහොතකම කැප වෙන්නේ ශ්‍රී ලාංකිකයන්ගේ උන්නතිය සඳහායි. සාන්ත ආගතා දේවස්ථානය අසළ පානීය ජලය බෙදා හැරීමේ අරමුණද එයම බවත් ඔබට දැන් පැහැදිලි වෙනු ඇත. අවශ්‍යයනම් ඔබට එම සත් ක්‍රියාවට, මුදලින් හෝ ශ්‍රමයෙන් සහභාගි විය හැක.
ලිපිය : විශාකා සෙනෙවිරත්න.
